سئوینجه بورگه­له­ییب سئوگیلیم! کدر منه وئر

چیچک ساتاندان اگر گول آلانماسان، گولو کی –

بیتیبدی سئوگی­میزین باغچاسین­دا، دَر، منه وئر!

اوتانما! گؤزلریمی یومموشام - اؤپوش دئمیرم –

او دویغودان - کی بیتَر آلنیم اوسته تَر - منه وئر

سن اولماسان بیلیرم وارلیغیم اوراقلاناجاق

هئچ اولماسا بیر ایچیم گؤزیاشی بو، خرمنه، وئر

حیات دئدیک­لری باشدان - باشا قارانلیق­دی

سحر دئدیم­می؟ باشارسان بیر آز سحر منه وئر

یورولموشام یاشاییش­دان، ناغیل­لارا منی آت!

قانادلی آت­لارا کی وورموسان یَهَر منه وئر –

هئچ اولماسا نئچه گونلوک قاچیم آدام­لاردان

تانینمامیش آدا یوخسا غاییب شهَر منه وئر

***

حیات دئییل دیله­ییم، یوخ، حیاتی آتماق اوچون

دویون قارین یا شراب وئر! یا دا زَهَر منه وئر!

بو گون دانیشگاهین پیلله­لرینه،

گؤز سالیب كئچمیشی یادیما سالدیم

سنین خیالینی گؤررکن یئنه،

بیرینجی پیلله­ده قورویوب قالدیم

یول­لاری آییریر پیلله­لر هله

آلاجاق الیمدن هر بیر کسیمی

هر پیلله­نین سونو باشقا بیر پیلله،

دال­ با دال دوزولوب یالان سؤز کیمی

خیالین آددیمین هاردان گؤتورور

من باخیشلاریمی اورا سریره­م...

سونرا قیچ­لاریما بیر قووّت گلیر،

خیالین گئتدیکجه، من­ده گلیرم...

بیر طبقه چیخدیق،

                   گؤردوم کی اوردا،

هر نه ائشیتمیشدیم تام یالانییدی

ایکینجی طبقه، باخیش­لاریمدا،

سانکی خاطیره­لر قبریستانییدی

بورا نفرتلی­دیر،

                   بورادا سس­سیز،

اوره­ییم،

          وارلیغیم،

                   هر زادیم ایتدی

هله یادیمدادیر، بیر گون سئوگیمیز،

بوردا باشلانمیشدی، بوردادا بیتدی

خیالین پیلله­دن چیخیر یوخاری

آنجاق آرخاسینجا چکیر منی­ده

بیزی دولاندیریر دویغو قاتاری،

اوچونجو، دؤردونجو طبقه­نی­ده...

ایندیسه گؤرورم بیر ماوی پالتار

اوندا گؤردویوم حال سنین حالین­دیر

همیشه­کی سسله چاغیریر:

                                    - «یاشار!»

بیلمیرم اؤزونسن یا خیالین­­دیر...

چاغیردی اویونا، قومار باشلاندی

بو قومارین آدی «سن» ایله «من» دیر

گئری­یه چکیلن اودوزوب – یاندی

بلکه­ده اودوزان چکیلمه­ین­دیر

بو قومار، سئوگی­دیر، یورمور اینسانی

«سنه» یئتیشینجه اونو بیتیردیم

نه اودانی بللی نه اودوزانی

«سنه» چاتان زامان «منی» ایتیردیم.

 یئنه­ده ايبهام­لار باشلانیب منه،

بوتون حیاتیمی بورویوب دومان

ایچیمده بیر ایستک دیل آچیب یئنه،

سؤیله­ییر:

           - «یئنی­دن سئوگیه اینان!»

«بیر یانیم جهنّم، بیر یانیم جنّت»

نفرتله سئوگینین آراسیندایام

بونلارین بیرینه اینانسام، البت،

پوزغون حیاتیمدان گئده­جک ايبهام

نفرته اینانسام – اینانا بیلسم –

اؤزوم تک دویغومدا بوغولاجاقدیر

سئوگي یه اینانسام – اینانا بیلسم -

قلمیمدن غزل دوغولاجاقدیر

ایندی بیلدیم هارا یوللاناجاغام،

سئوگی مرکبینه تازا مین­میشم

نفرتین نه­یینه آللاناجاغام؟!

ازلدن سئوگییه دویون­لنمیشم!

 خیالین یویوروب هنده­وریمه

گؤزلرین سئوگیه چاغیریر منی

گؤزه­لیم ! آند اولسون غزل­لریمه،

سئویر­م،

                سئویرم،

                          سئویر­م سنی.

دون گئجه یوخودا گؤرموشم سنی

سانیرام یوخومو، ائوین بیلمیشدین

سونونجو شئعریمی دینله­مک اوچون

دون گئجه یوخوما قوناق گلمیشدین

سن هارا؟ کابوسلو یوخولار هارا؟

دون گئجه دییه­سن یول ایتیرمیشدین

ظولمتی سؤندوره­ن چیراق­لار کیمی

قارانلیق گئجه­مه نور گتیرمیشدین

سؤز آچدیم – سئوگی­دن سؤز آچدیم سنه -

سئوگی زنجیرینده اسیرم دئدیم

دیلیم سؤزلریمی توتا – توتمایا

سسیم اسه- اسه، «سئویرم» دئدیم...

اویاندیم، فیکیرلر بورودو منی

یوخومو عؤمرومون حسرتی ساندیم

سنینله برابر اولان یوخودان

اؤزومده بیلمیرم، نییه اویاندیم؟!

محبّت دونیادان کؤچمه­ییب ایر

بس نییه سئوگیمیز یوخونو سئچیر؟!

بلکه گئرچک یوخو حیاتیمیزدی!

بلکه گئرچک حیات یوخودا کئچیر!

 ایندی سون شئعریمی اوخویوب سنه

یوخومو آلارام حیاتیمیزا

او شیرین یوخودان، شئعرین گوجویله

بیر کؤرپو سالارام حیاتیمیزا

دون گئجه، یوخوما گلمیشدین، دئمک

یوخودا گؤررمیش سئون - سئونی

سئوگیلیم! سؤزومو غوربته سالما

دون گئجه یوخودا سئومیشم سنی..!

نئچه آي چاي­لار تك هر يئردن آخيب

يئتيشديك دنيزه – سئوگي­يه – بيزده

بيردن نه ­لر اولدو عشقي بوراخيب

نيفرته اينانديق بيز – ايكيميزده –

 سانميشديم؛ مهربان ايستي ال­لرين

گونش­له دولدورار بو ايل قيشيمي

يازيق­لار اولسون ­كي، واخت­سيز گئتمه ­يين

جهنّم ائيله ­دي ياشاييشيمي

ايندي من؛ ال­لريم سني آختارير

ايندي سن؛ ‌گؤزلرين يول­لاردا قاليب

ايندي بيز؛ بولود تك گؤزلر آغلايير

بيلميرم كيم بيزي بو حالا ساليب...

ŽŽŽ

اؤزومه باخماكي غرور وار منده

دؤزمورم هئچ كيمين دانلاق­لارينا

كؤلگه ­م مغرور دئييل،‌سني گؤره ­نده

يئنه دؤشه ­نه ­جك اياق­لارينا...

غم يئمه! نه قده ­ر آيري قالساق­دا

رؤيالاريميزدا اؤپوشه ­جه ­ييك

يئر – گؤي، ال – بير اولوب آيريليق سالسا

گئجه ­لر يوخودا گؤروشه ­جه ­ييك ...

آرزیم بودو؛ سئودامی قاچیردام یاتاغیندان